>
Latwergsteak Bistro - Innenansicht Kunstvoll gefaltete Serviette Sommerliche Terrasse Innenansicht Restaurant Innenansicht Bistro

 

Des Haus hässt zwa noch „Pälzer Hof“,
doch nix mee waas mit Danz und Schwoof.
Im Owwerschdock, modern un schää,
tagt jetzt de Rat vun de Gemää,
des ganze Erdgeschoß waa nur,
reserviert vor die Kuldur.
Do waa dann groß und gänzlich nei,
e großi schääni Bischerei.
Die Wertschaft, frieher Mittelpunkt,
hot mer  jetzt in de Keller gschdumpt,
mit wennich Luft un Licht un Sunne,
mer männt, die Planer hänn gespunne.

S' Lokal im Keller war nit schlecht,
doch 's Publikum hot nit so recht,
sich hocke wolle in der Keller,
trotz meischdens gut gefillte Deller.
So kam's dann aa wie kumme muss,
uff emol waa im Keller Schluß.
Des Haus hieß zwa noch Pälzer Hof
doch ohne Wertschaft waas rescht doof,
un des a noch e längerie Zeit,
vor manchen waas e Ewichkeit.

Aach de Rat vun de Gemää,
fand die Lage nit me schää,
hot lang un bräd oft debatiert,
viel gerechend, dischbediert,
und dann, veninfdich, hot beschlosse,
Die Bicherei hier werde geschlosse.



Meer machen in de Schul de Keller,
richdich drucke un noch heller,
einiche Räum' faschd gänzlich nei,
als Platz for unser Bicherei.
E Schul, als Bildungszentrum wichdich,
dort is e Bicherei grad richdich,
un wie mer als im Dorf so heert,
die Weisremer henns a kapiert.

De Pälzer Hof, wies em gebiert,
werd' widder umfunktioniert,
im Erdgeschoss wies frieher waa,
kummt noi e Wertschaft, sunneklaa,
un weils halt hot en bessre Klang,
hässts jetzt naddierlich Resdaurang.
Jetzt isses wie in alder Zeit,
en Tempel der Gemietlichkeit;
mer kann dort jetzt, dank Holger Cott,
speise, schlemme wie in Gott,
große Menie's, a kleene Sache,
gemietlich sitze, aach viel Lache,
esse, drinke unverdrosse,
de Dorfklatsch sich vezeele losse.
Kann feiere aach, wies frieher waa,
mit enner große Gästeschaa,
un dess zu resonable Preise,
des will for Weisrem ebbes heisse.
Dess is wie'n scheene Film am End,
schlussendlich noch e Happy End.

Weisenheim, Aug. 2008              Helmut Daut